MSAKO MKALI WA UCHIMBAJI WA MADINI KANDO MWA BWAWA LA MINDU.

Ndg.Christopha Evarist Bengu aliyekamatwa akichimba madini kando mwa Bwawa la Mindu.

Mamlaka ya Majisafi na Usafi wa mazingira Morogoro (MORUWASA) inaendelea na zoezi la kuhifadhi mazingira katika vyanzo vyake vya maji kwa wakazi wa Morogoro.Katika kuhakikisha hilo leo Maaskari wanaolinda Bwawa la Mindu wameweza kuwakimbiza watu zaidi ya kumi (10) waliokuwa wanachimba madini lakini wakafanikiwa kumkamata mchimbaji mmoja.

Ndg.Christopha Evarist Bengu akiwa chini ya ulinzi

Akiongea na Blogu hii Mkurugenzi Mtendaji wa MORUWASA Ndg.John K.Mtaita amesema mtuhumiwa huyo aitwaye Ndg.Christopha Evaristi Bengu anapelekwa Polisi kwa kuweza kupelekwa Mahakamani.

Mkurugenzi mtendaji wa MORUWASA Ndg.John K.Mtaita.

Ikumbukwe kwamba wakazi wa Morogoro mpaka sasa wana uhaba mkubwa wa maji kutokana na ukame unaosababishwa na uchafuzi wa mazingira unaofanywa na wakazi wa Morogoro.

MKURUGENZI TAZARA AACHIA NGAZI

Aliyekuwa Mtendaji mkuu wa TAZARA Bw.Akashambatwa Mbikusite

Mkurugenzi wa Mamlaka ya Reli ya Tanzania na zambia Bw. Akashambatwa Mbikusita-Lewanika ameachia ngazi baada ya kampeni zake za kuendelea kwa kipindi kingine cha miaka 3 kushindikana.
Inasemekana muda wa kuiongozwa TAZARA kwa Bw.Akashambatwa uliisha rasmi mwishoni mwa Januari 2013 lakini uliongezwa kutokana na ombi maalum la uongozi wa nchi ya Zambia.

RAIS WA ZANZIBAR AKUTANA NA MKURUGENZI WA BENKI YA DUNIA KWA NCHI ZA AFRIKA MASHARIKI.

Rais wa Zanzibar Dr.Ali Mohamed Shein akizungumza na Mkurugenzi wa Benki ya Dunia Afrika Mashariki Ikulu Zanzibar

Rais wa Zanzibar na mwenyekiti wa baraza la mapinduzi Dr.Ali Mohamed Shein amekutana na Mkurugenzi wa Benki ya Dunia kwa nchi za Tanzania,Uganda na Burundi Ndg.Philippe Dongie hii leo Ikulu mjini Zanzibar kwa mazungumzo.

BREAKING NEWS: KIWANDA CHA NGUO CHA MAZAVA MOROGORO CHAPATA SHOTI YA UMEME

Kiwanda cha nguo za michezo cha Mazava kilichopo eneo la msamvu Morogoro kimepata hitilafu ya umeme na kuwaka moto hali iliyopelekea jumla ya watu 53 kulazwa hospitali ya mkoa kutokana na mshtuko. Meneja mwajiri wa kiwanda hicho Ndg. William Deus amethibitisha kutokea kwa tukio hilo na hakuna mtu yeyote aliyenaswa na umeme. Habari zaidi zitawajia baadae.

BREAKING NEWS: SERIKALI YAINGILIA KATI UCHAGUZI WA TFF

Waziri wa Habari,Vijana,Michezo na Utamaduni Dk.Fennela Mukangara

Serikali kwa kupitia waziri wa habari ,vijana ,michezo na utamaduni Dk.Fennela Mukangara imeingilia kati na kubadilisha mchakato wote wa uchaguzi wa TFF kwa madai ya kuwa katiba iliyotumika si halali na kutaka uchaguzi huo ufanyike upya kwa kupitia katiba mwaka 2006 na kwamba kwa kutumia ibara ya 10 ya katiba ya Jamhuri ya Muungano wa Tanzania kumuondoa msajili wa vyama na vilabu michezo.

NUSU YA WATAHINIWA MTIHANI WA KIDATO CHA NNE WAPATA SIFURI

Waziri wa Elimu na Mafunzo ya Ufundi, Dk. Shukuru Kawambwa (MB) leo ametangaza rasmi matokeo ya Mitihani ya Kidato cha Nne, maarifa-QT.

TAARIFA YA MATOKEO YA MITIHANI YA MAARIFA (QT) NA KIDATO CHA NNE (CSEE)

ILIYOFANYIKA OKTOBA 2012

1.0  UTANGULIZI

Mitihani ya Kidato cha Nne (CSEE) na Maarifa (QT) kwa mwaka 2012 ilifanyika nchini kote kuanzia tarehe 8-25 Oktoba 2012.  Napenda kuchukua nafasi hii kutangaza rasmi matokeo ya mitihani hiyo kama ifuatavyo :

2.0 MTIHANI WA MAARIFA (QT)

2.1  Usajili na Mahudhurio

Katika Mtihani wa Maarifa 2012 watahiniwa waliosajiliwa ni 21,310 ambapo wasichana walikuwa ni 13,134 na wavulana ni 8,176. Jumla ya watahiniwa 17,137 sawa na asilimia 80.42 ya waliosajiliwa wamefanya Mtihani. 

2.2 Matokeo ya Mtihani wa Maarifa (QT)

Watahiniwa 5,984 kati ya 17,137 waliofanya mtihani wamefaulu Mtihani wa Maarifa (QT).

3.0 MTIHANI WA KIDATO CHA NNE (CSEE) 2012

Jumla ya vituo 5,058 vilitumika katika kufanya Mtihani wa Kidato cha Nne 2012 ambapo vituo 4,155 vilikuwa vya watahiniwa wa shule na vituo 903 vilikuwa ni vya watahiniwa wa kujitegemea.

3.1 Usajili na Mahudhurio ya Watahiniwa
 (a) Watahiniwa Wote

Jumla ya watahiniwa 480,036 walisajiliwa kufanya Mtihani wa Kidato cha Nne 2012 wakiwemo wasichana 217,583 sawa na asilimia 45.33 na wavulana 262,453 sawa na asilimia 54.67.  Watahiniwa waliofanya mtihani wa Kidato cha Nne 2012  ni 456,137 sawa na asilimia 95.44. Watahiniwa 21,820 sawa na asilimia 4.55 ya watahiniwa wote waliosajiliwa hawakufanya mtihani.

(b) Watahiniwa wa Shule

Watahiniwa wa shule waliosajiliwa ni 411,230 wakiwemo wasichana 182,978 sawa na asilimia 44.50 na wavulana 228,252 sawa na asilimia 55.50.  Watahiniwa wa shule waliofanya mtihani walikuwa 397,136 sawa na asilimia 96.57. Aidha, watahiniwa 14,090 sawa na asilimia 3.43 hawakufanya mtihani kutokana na sababu mbalimbali zikiwemo utoro,  ugonjwa na vifo.

(c)  Watahiniwa wa Kujitegemea

Watahiniwa wa kujitegemea waliosajiliwa walikuwa ni 68,806 wakiwemo wasichana 34,605 sawa na asilimia 50.29 na wavulana 34,201 sawa na asilimia 49.71. Watahiniwa 61,001 wakiwemo wasichana 30,917 na wavulana 30,084  wamefanya mtihani wakati watahiniwa 7,730 sawa na asilimia 11.23  hawakufanya mtihani.

4.0 MATOKEO YA MTIHANI WA KIDATO CHA NNE

(a) Watahiniwa wa Shule

Jumla ya watahiniwa wa shule 126,847 kati ya watahiniwa 397,136 waliofanya Mtihani wa Kidato cha Nne 2012 wamefaulu. Wasichana waliofaulu ni 46,161 na wavulana ni 80,686.

(b) Watahiniwa wa Kujitegemea

Idadi ya watahiniwa wa kujitegemea waliofaulu mtihani ni 16,112 kati ya watahiniwa 61,001 waliofanya mtihani.  Wasichana waliofaulu ni 6,751 na wavulana ni 9,361. 

5.0 UBORA WA UFAULU KWA MADARAJA NA JINSI

Ubora wa ufaulu kwa kuangalia madaraja waliyopata watahiniwa wa shule unaonesha kuwa jumla ya watahiniwa 23,520 wamefaulu katika madaraja I – III ambapo kati yao wasichana ni 7,178 na wavulana ni 16,342.Mchanganuo wa ufaulu kwa kila Daraja kwa jinsi kwa Watahiniwa wa Shule mwaka 2012 ni kama ifuatavyo:

Daraja	Idadi ya Wavulana	Idadi ya  Wasichana	Jumla
I	1,073	568	1,641
II	4,456	1,997	6,453
III	10,813	4,613	15,426
I-III	16,342	7,178	23,520
IV	64,344	38,983	103,327
0	120,664	120,239	240,903

6.0 SHULE ISHIRINI ZILIZOFANYA VIZURI ZAIDI KATIKA KUNDI LA SHULE ZENYE WATAHINIWA 40 AU ZAIDI

Ubora wa ufaulu wa shule umepangwa kwa kutumia kigezo cha “Grade Point Average” (GPA) kuanzia A = 1 hadi F = 5.  Shule zenye watahiniwa 40 na zaidi ziko 3,391. Shule ya kwanza hadi ya ishirini zimeainishwa kwenye Jedwali lifuatalo :

NAFASI	JINA LA SHULE	IDADI YA WATAHINIWA	MKOA
1	ST. FRANCIS GIRLS	90	MBEYA
2	MARIAN BOYS S.S	75	PWANI
3	FEZA BOYS S.S	69	DAR ES SALAAM
4	MARIAN GIRLS S.S	88	PWANI
5	ROSMINI  S S	78	TANGA
6	CANOSSA S.S	66	DAR ES SALAAM
7	JUDE MOSHONO S S	51	ARUSHA
8	ST. MARY’S  MAZINDE JUU	83	TANGA
9	ANWARITE GIRLS S S	49	KILIMANJARO
10	KIFUNGILO  GIRLS S S	86	TANGA
11	FEZA GIRLS	49	DAR ES SALAAM
12	KANDOTO SAYANSI GIRLS SS	124	KILIMANJARO
13	DON BOSCO SEMINARY SS	43	IRINGA
14	ST.JOSEPH MILLENIUM	133	DAR ES SALAAM
15	ST.JOSEPH’S ITERAMBOGO SS	64	KIGOMA
16	ST.JAMES SEMINARY SS	44	KILIMANJARO
17	MZUMBE SS	104	MOROGORO
18	KIBAHA SS	108	PWANI
19	NYEGEZI SEMINARY SS	68	MWANZA
20	TENGERU BOYS SS	76	ARUSHA

7.0 SHULE KUMI AMBAZO HAZIKUFANYA VIZURI ZAIDI KATIKA KUNDI LA SHULE ZENYE WATAHINIWA 40 AU ZAIDI

NAFASI	JINA LA SHULE	IDADI YA WATAHINIWA	MKOA
1	MIBUYUNI S.S	40	LINDI
2	NDAME  S.S	41	UNGUJA
3	MAMNDIMKONGO S.S	63	PWANI
4	CHITEKETE S.S	57	MTWARA
5	MAENDELEO S.S	103	DAR ES SALAAM
6	KWAMNDOLWA S.S	89	TANGA
7	UNGULU S.S	62	MOROGORO
8	KIKALE S.S	60	PWANI
9	NKUMBA S.S	152	TANGA
10	TONGONI S.S	56	TANGA

8.0 TATHMINI YA UFAULU WA WATAHINIWA WA MTIHANI WA   KIDATO CHA NNE MWAKA 2012 

8.1 Tathmini ya awali iliyofanyika kuhusu ufaulu wa watahiniwa katika shule mbalimbali inaonesha kuwa shule zilizofanya vizuri zaidi ni zile ambazo zina mahitaji yote ya msingi ikiwemo walimu wa kutosha, miundombinu na vifaa vya kufundishia na kujifunzia.  Aidha, shule zenye ufaulu wa chini ni zile ambazo zina changamoto mbalimbali ikiwa ni pamoja na:

(i) Baadhi ya shule za vijijini hazina kabisa walimu wa masomo ya Sayansi na Hisabati na pia zina upungufu mkubwa wa walimu wa masomo mengine;

(ii) Kutokuwepo kwa maabara kwa shule zenye mikondo ya sayansi na pia kutokuwepo kwa maktaba kwa ajili ya kujisomea; na

(iii) Upungufu mkubwa wa vitabu vya kiada na ziada. Katika baadhi ya shule uwiano wa kitabu kwa mwanafunzi ni 1:10.

8.2 Mkakati wa Serikali ni kuendelea kupunguza changamoto hizo kila mwaka ikiwa ni pamoja na kufanya mambo yafuatayo:

(i) Kuajiri walimu kila mwaka ili kuondoa upungufu uliopo katika shule zetu. Mwaka 2011/2012 Serikali iliajiri walimu wa sekodari 13,246 na mwaka huu wa fedha 2012/2013 imeajiri walimu 12,973 ambao wamepangwa katika shule zenye upungufu mkubwa wa walimu. Ajira ya walimu wapya mwaka huu umetuwezesha kuwa na wastani wa walimu 2-3 kwa shule.  Hali hii itaendelea kuboreka kadri tunavyoendela kuajiri walimu.

(ii) Kuboresha miundombinu iliyoko katika shule zetu ikiwa ni pamoja na kujenga nyumba za walimu, madarasa na maabara. Mwaka 2012/2013 Serikali imepanga kuboresha miundombinu katika shule 264 zilizopo katika mazingira magumu ikiwemo miundombinu ya maabara na nyumba za walimu.

(iii) Kuendelea kutoa ruzuku ya Tsh 25,000 kwa mwanafunzi kwa mwaka, ambapo asilimia 50 ya fedha hizo ni kwa ajili ya ununuzi wa vifaa vya kufundishia na kujifunzia ili kuziwezesha shule kununua vitabu pamoja na vifaa vingine muhimu kitaaluma.

(iv) Wizara kuendelea kuzishauri Halmashauri kuweka mgawanyo mzuri wa walimu waliopo baina ya shule na shule.

(v) Wizara itaendelea kuimarisha Idara ya Ukaguzi wa Shule pamoja na kuwawezesha Waratibu Elimu Kata na Wakuu wa Shule kufanya ukaguzi wa ndani katika Shule za Sekondari zilizo katika maeneo yao.

9.0 MATOKEO YA MITIHANI YALIYOZUIWA

Baraza la Mitihani la Tanzania limezuia kutoa matokeo ya:

(a) Watahiniwa 28,582 wa Shule ambao hawajalipa ada ya Mtihani hadi watakapolipa ada wanayodaiwa pamoja na faini; na ikiwa hawatalipa katika kipindi cha miaka miwili (02) toka matokeo kutangazwa, matokeo yao yatafutwa.

(b) Watahiniwa 65 wa kujitegemea na 71 waliofanya Mtihani wa Maarifa (QT) mwaka 2012 bila ya kulipa ada ya Mtihani hadi watakapolipa ada pamoja na faini. Ikiwa hawatalipa ada hiyo katika kipindi cha miaka miwili (02) toka matokeo kutangazwa, matokeo yao yatafutwa.

10.0 MATOKEO YA MITIHANI  YALIYOFUTWA

10.1  Matokeo Yaliyofutwa Kwa Sababu ya Udanganyifu

Jumla ya watahiniwa 789 wamefutiwa matokeo yao yote ya mtihani kwa mujibu wa kifungu Na.52(b) cha Kanuni za Mitihani baada ya kubainika kuwa walifanya udanganyifu katika mitihani ya Oktoba 2012. Kati yao, watahiniwa wa shule ni 624 na watahiniwa wa kujitegema ni 148 na watahiniwa wa Mtihani wa Maarifa (QT) ni 17. Aina ya udanganyifu uliobainika na idadi ya watahiniwa husika ni kama ifuatavyo:

S/N	AINA YA UDANGANYIFU	IDADI YA WATAHINIWA
(i)	Watahiniwa kubainika kuwa na skripti zenye miandiko tofauti au kuwa na miandiko tofauti katika skripti ya somo moja au zaidi ya moja.	04
(ii)	Watahiniwa kukamatwa na wasimamizi ndani ya chumba cha mtihani wakiwa na ‘notes.’	170
(iii)	Watahiniwa kubainika kuwa na mfanano usio wa kawaida wa majibu.	590
(iv)	Watu kukamatwa wakiwafanyia watahiniwa wengine mtihani ‘impersonation”.	04
(v)	Watahiniwa kukamatwa na simu ndani ya chumba cha mtihani.	06
(vi)	Watahiniwa kukamatwa na wasimamizi wakibadilisha karatasi za maswali au skripti kwa lengo la kufanya udanganyifu.	15
	JUMLA	789

10.2 Matokeo Yaliyofutwa Kwa Sababu ya Watahiniwa Kuandika Matusi Katika Skripti Zao

(i) Jumla ya watahiniwa 24 waliandika matusi kwenye skripti zao za masomo mbalimbali. Kitendo hicho ni kosa kwa mujibu wa kifungu 5(13) cha Kanuni za Mitihani kinachosomeka:

“Written responses to any examination question which carry words, drawings or pictures connected to sex or abusive language in such a way that it becomes offensive shall consitute an examination offence and a candidate who commits such an offence shall be punished by the Council.”

Kutokana na kosa hilo Baraza la Mitihani limefuta matokeo  yao yote kwa mujibu wa Kifungu cha 6(2)(a) cha Kanuni za Mitihani kinachosomeka:  

“A candidate found to have committed an examination offence shall – (a) have his examination results nullified”

(ii)Kitendo cha kuandika matusi kwenye karatasi za majibu (skripti) kinaonesha utovu wa nidhamu wa hali ya juu. Serikali haitaweza kuwavumilia hata kidogo watahiniwa wa aina hiyo. Hivyo, Serikali itaangalia hatua zaidi za kisheria za kuchukua dhidi ya watahiniwa wote walioandika matusi.

Kwa mujibu wa kifungu Na. 6(2)(b) cha Kanuni za Mitihani, watahiniwa wote waliobainika kufanya udanganyifu katika mitihani au kuandika matusi katika skripti zao hawataruhusiwa kufanya mitihani inayoendeshwa na Baraza la Mitihani la Tanzania  kwa kipindi cha mwaka mmoja (01) kuanzia tarehe ya kutangazwa kwa matokeo.

11.0 KUANGALIA MATOKEO YA MTIHANI WA CSEE na QT, 2012

(a) Matokeo ya Mtihani wa Kidato cha Nne (CSEE) na Maarifa (QT), 2012  yanapatikana katika tovuti zifuatazo: 

     ·   www.matokeo.necta.go.tz,

    ·  www.necta.go.tz,     

    ·  www.udsm.edu.ac.tz, au

    ·  http://www.moe.go.tz

(b) Matokeo yanaweza kupatikana pia kwa njia ya  ujumbe mfupi wa maneno (SMS) kwenda namba 15311. Jinsi ya kutuma ujumbe andika:

MATOKEOXNAMBA YA KITUOXNAMBA YA MTAHINIWA

                                  (Mfano : matokeoxS0101x0503)

Dkt.  Shukuru Jumanne Kawambwa (Mb)

WAZIRI WA ELIMU NA MAFUNZO YA UFUNDI

18 Februari 2013

BREAKING NEWS: MAPIGANO YA KIDINI YAPOTEZA MAISHA YA RAIA BUSELESELE GEITA

Habari zilizotufikia hivi punde zinasema kuwa kumezuka mapigano kati ya Waislam na Wakristu huko Geita .Inadaiwa katika machafuko hayo,mtu mmoja amepoteza maisha kufuatia sakata la uchinjaji nyama ambapo inasemekana wachungaji wa kanisa la AIC wamewatangazia waumini wake kutokula nyama inayochinjwa na Waislam na kwamba leo wakristo wa eneo la Buselesele wamefungua Mabucha yao na kuanza kuuza nyama. Tutaendelea kuwapasha habari zaidi kadri tutakavyokuwa tunazipata habari.

KITALE AFUNGA NDOA NA KUUAGA UKAPELA.

Kitale akiwa na mkewe Bi Fatuma

 Hatimaye msanii wa filamu za komedi ameamua kuuaga ukapela na kuoa baada ya hiyo jana kufunga pingu za maisha na mke wake Bi Fatuma Salumu.

Kitale akiwa anafungishwa nikhai

 Ndoa hiyo ilifungiwa maeneo ya Mwananayamala jijini Dar es salaam mnamo saa nane hivi mchana.Kama kazi yake inavyohakisi,sherehe za ufungaji wa ndoa hiyo ziliudhuriwa na watu wengi ili kuhakikisha mambo yanaenda sawa.

BREAKING NEWS: MOTO WAIBUKA NA KUUNGUZA VITU STENDI YA MWENGE

Moto uliozuka katika maduka ya eneo la Mwenge kituo cha mabasi umedhibitiwa na vikosi vya zimamoto na sasa hali ni shwari ingawa shughuli nyingi za kibiashara bado zimesimama wahusika wakihofia usalama wa mali zao.

BREAKING NEWS: MVUA ZALETA MAAFA MJINI MOROGORO

Barabara Morogoro ikiwa imejaa maji

Mvua zinazoendelea kunyesha mjini Morogoro zinazidi kuleta maafa baada mvua zilizonyesh usiku wa leo zimewaathiri wakazi wa hapa baada ya nyumba kujaa maji na baadhi ya barabara kufungwa kutokana na kujaa maji.

Maji yakiwa yamejaa barabarani eneo la Mtawala karibu na uwanja wa Shujaa

Magari yakiwa yanajiuliza namna ya kupita katika barabara Uwanja wa Shujaa.

Tatizo hili limeweza kuzikumba na baadhi ya Ofisi za Serikali ambapo katika ofisi za MORUWASA na Ofisi za Bonde la Wami/Ruvu maji yalijaa getini kiasi cha wafanyakazi wenye magari kushindwa kupita na kusubiri maji yapungue.

Geti la ofisi za MORUWASA na Bonde la Wami/Ruvu likiwa limejaa maji.